Futbol üzrə Topaz Premyer Liqasında çempionluğu təmin etmiş Ağdamın "Qarabağ” klubu "Xəzər Lənkəran”la son tur matçında aparıcı legionerlərinin xidmətindən yararlanmayacaq. Bu barədə Sportnet.az-a klubun baş direktoru Əmrah Çəlikəl məlumat verib.
Onun sözlərinə görə, mayın 17-də keçiriləcək qarşılaşmada "Qarabağ”ın uzaq ölkələrdən olan əcnəbi futbolçuları yer almayacaq. Baş məşqçi Qurban Qurbanov bir sıra legionerləri, o cümlədən, braziliyalı trio – Riçard Almeyda, Reynaldo və Çumbinyonu öz ölkələrinə göndərib. Onlar Çempionlar Liqasına hazırlığın başladığı vaxt geri qayıdacaqlar. Bu isə o anlama gəlir ki, "Xəzər Lənkəran”la matçdan sonra Ağdam təmsilçisinin liderləri çempionluq kubokunu başları üzərinə qaldırmaq sevincini yaşaya bilməyəcəklər.
Çəlikəl bildirib ki, yaxın ölkələrdən, daha dəqiqi, Albaniya, Makedoniya və Gürcüstandan olan legionerlər hazırda klubun düşərgəsindədirlər. Onlar şans veriləcəyi təqdirdə, son turda meydana çıxa bilərlər.
