Çempionlar Liqası və Avropa Liqasında qarşıdakı 3 mövsüm üçün klublara veriləcək pulun miqdarı açıqlanıb. Sportnet.az-ın məlumatına görə, Avropa Klublar Birliyi (ECA) və UEFA arasında əldə olunan razılaşmaya əsasən Avropanın ən nüfuzlu klub turniri üçün 1.257 milyard avro ayrılıb.
Klublara veriləcək bu məbləğin 724.4 milyonu sabit, 482.9 milyon avrosu isə ev oyunlarının yayımına əsasən paylanılacaq. Qrupda keçirdiyi bütün oyunlarda qələbə qazanan komanda yayım haqları istisna olmaqla, 54.5 milyon avro qazanacaq.
Qrup mərhələsinə qatılan komandalara 12 milyon, qrup oyunlarında qazanılan qələbəyə görə, 1.5 milyon, heç-heçəyə görə, 500 min avro veriləcək. 1/8 finala yüksələnlər 5.5 milyon, 1/4 finalçılar 6 milyon, yarımfinal iştirakçıları isə 7 milyon avro qazanacaq. UEFA finalda məğlub olan komandaya 10.5 milyon, çempiona isə 15 milyon avro mükafat verəcək.
Avropa Liqasında komandalara veriləcək məbləğ isə 381 milyon avrodur. Onun 228.6 milyonu sabit mükafatlar, 152.4 milyon avronu isə yayım hüquqları əhatə edəcək. Burada məbləğ çempionlar Liqasından az olduğundan bir klubun yayım gəlirləri istisna olmaqla, ən çox qazanacağı məbləğ 15.31 milyon avrodur.
Avropa Liqasının qrupuna düşmək klublara 2.4 milyon, 1/16 finala vəsiqə qazanmaq 500 min, 1/8-ə yüksəlmək 750 min, 1/4 final üçün 1 milyon, yarımfinala çıxacaqları halda isə 1.5 milyon avro qazandıracaq.
Çempion olan komanda 6.5 milyon, Avroliqanın ikincisi isə 3.5 milyon avro əldə edəcək. Qrup oyunları zamanı qələbə üçün 360 min avro gəlir əldə edəcək komandalar oyunu heç-heçə ilə başa vurduqları zaman klub büdcəsinə 120 min avro xeyir verəcək.
