"Xəzər Lənkəran" komandası Azərbaycan Premyer Liqasında AZAL-la keçirəcəyi növbəti oyununun hazırlıqlarına başlayıb. Bu barədə Sportnet.az-a klubun mətbuat xidmətinin rəhbəri Hüseyn Cəbrayıloğlu məlumat verib.
Onun sözlərinə görə, "Xəzər Lənkəran"ın heyətində iki nəfərdən başqa bütün futbolçular məşqlərə qoşulub: "Komanda dünəndən Lənkərandakı bazasında bir araya toplanıb. Məşqlər davam edir. Hazırda heyətdə iki zədəli var. Sadio Tonkara Türkiyədə əməliyyatdan çıxıb. Reabilitasiya keçir. Gən futbolçularımızdan isə İlyas Səfərdə zədəlidir. Qalan bütün futbolçular məşqlərdə iştirak edirlər. Ayın 15-nə kimi məşqlərimiz Lənkəranda olacaq. Komandada hər şey qaydasındadır".
Cəbrayıloğlu "ağ-yaşıllar"ın baş məşqçisi Elbrus Məmmədovun komandada gələci haqda bunları söyləyib: "Elbruz müəllim kateqoriya üçün dərslərdə iştirak edəcək. Qayıtdıqdan sonra əməkdaşlığımıza davam edəcəyik. Onun yoxluğunda isə komandanı oyunlara Yunis Hüseynov çıxaracaq".
Qeyd edək ki, "Xəzər Lənkəran" - AZAL matçı mayın 16-da baş tutacaq.
