Kişi boksçulardan ibarət Azərbaycan milli komandası Tokio Yay Olimpiya Oyunlarına hazırlığı başa vurub.
Federasiyanın mətbuat xidmətindən Sportnet.az-a verilən məlumata görə, yığma təlim-məşq toplanışının son mərhələsini İtaliyanın Assizi şəhərindəki Boks Akademiyasında keçib. 10-dək ölkə təmsilçisinin qatıldığı məşqlərdə əsasən fiziki və taktiki hazırlığa diqqət yetirilib.
Milli komandanın baş məşqçisi Umberto Orta Dominqes təlim-məşq toplanışından razı qalıb. O, abf.az-a bildirib ki, boksçuların hər biri Tokio Yay Olimpiya Oyunlarına hazırdır: “Toplanışı çox gözəl şəkildə başa vurduq. Komandamız iyulun 18-də Yay Olimpiya Oyunlarında iştirak üçün Tokioya yollanacaq. Məşq proseslərimiz çox yüksək səviyyədə keçdi. Boksçuların hazırlığından, xüsusilə də fiziki durumundan çox razıyam. Hər biri Olimpiadanın startını səbirsizliklə gözləyir. Çəkilərində də problem yoxdur”.
Təcrübəli kubalı mütəxəssis Tokio-2020-dən gözləntilərini də açıqlayıb. O, Olimpiadada iştirak edəcək Tayfur Əliyev (57 kq), Cavid Çələbiyev (63 kq), Lorenso Sotomayor (69 kq), Alfonso Dominges (81 kq) və Məhəmməd Abdullayevin (+91 kq) hər birindən uğur gözlədiyi deyib: “Bütün boksçulardan medal gözləyirəm. Tayfur da fəxri kürsüyə qalxa bilər. Cavid dünya çempionudur, burada da öz sözünü demək gücündədir. Alfonso dünya reytinqində ikincidir. Onun da medal şansı yüksəkdir. Sotomayorun da Oyunlarda medal qazandığını nəzərə alsaq, bu dəfə də ümidlərimiz böyükdür. Məhəmməd də perspektivli idmançıdır və yarışda medal hədəfləyib. Bir sözlə, hər birinin mükafat qazanmaq şansı var. Amma hər bir yarışda idman şansının da vacib olduğunu yaddan çıxarmalı deyilik. Məqsədimiz Tokioda ən yaxşı şəkildə çıxış etməkdir”.
Qeyd edək ki, Azərbaycan boksçuları Tokioya İtaliyadan yollanacaqlar. Oyunlarda boks yarışları iyulun 24-də start götürəcək və avqustun 8-də bitəcək. Döyüşlər “Ryoqoku Kokuqikan” İdman Sarayında keçiriləcək.
