İspaniya Superkuboku uğrunda "Barselona" və "Atletik" arasında cavab görüşü keçirilib. Sportnet.az-ın məlumatına görə, "Nou Kamp" stadionunda baş tutan qarşılaşmada qalib müəyyənləşməyib - 1:1.
Hesabı 43-cü dəqiqədə meydan sahiblərinin futbolçusu Lionel Messi açıb. 74-cü dəqiqədə isə Bilbao komandasından Arits Adurits fərqlənib. Komandalar matçı 10 oyunçu ilə başa vurublar. "Barsa"dan 56-cı dəqiqədə Xerard Pike, "Atletik"dən isə Kike Sola birbaşa qırmızı vərəqə ilə meydandan qovulub.
Bu komandalar arasındakı ilk görüşdə Bilbao komandası 4:0 hesabı ilə qalib gəlib. Nəticədə "Atletik" tarixində ikinci dəfə İspaniya Super Kubokuna sahib olub. "Barselona"nın hesabında isə 11 belə kubok var ki, bu da ölkədə rekorddur.
