Bakı 2015 Avropa Oyunları bu gün Türkiyənin aparıcı idman kanalı olan NTV Spor ilə beynəlxalq yayım haqqında ilkin saziş bağlayıb. Sportnet.az-ın məlumatına görə, NTV Spor bütün Türkiyə ərazisində I Avropa Oyunlarının yayımını həyata keçirməklə gələn ilin yayında keçiriləcək 17 günlük yarışları canlı izləməkdə idman azarkeşlərinə imkan yaradacaq.
Telekanal televiziya, internet və mobil platformalar üzərindən hər gün Oyunların 7 saatlıq təqdimatını keçirəcək. Bunun böyük hissəsi canlı yayımlanacaq. Eyni zamanda, yarışların parlaq məqamlarından seçilmiş videomateriallar ilə birgə Açılış və Bağlanış mərasimləri də canlı nümayiş olunacaq.
Bakı 2015 Avropa Oyunları Əməliyyat Komitəsinin Əməliyyatlar üzrə Baş Direktoru cənab Saymon Kleq deyib: "İlk beynəlxalq yayım sazişi bağladığımızı elan etməyə çox şadam. Sözügedən saziş milyonlarla türkiyəli idman azarkeşinə birinci Avropa Oyunlarını canlı izləmək imkanı yaradacaq.
NTV Spor kanalı Türkiyənin ən böyük media konqlomeratlarından birinin bir hissəsi olan Doğus Media Group-a məxsusdur. Beynəlxalq İdman Yayımı Şirkəti Oyunlar müddətində 800 saatdan artıq canlı, müasir televiziya təqdimatı nümayiş etdirəcək.
