İtaliya milli komandasının baş məşqçisi Antonio Konte Azərbaycan və Malta yığmaları ilə keçirəcəkləri AVRO-2016-nın seçmə qrup matçlarını dəyərləndirib. Sportnet.az-ın məlumatına görə, gənc mütəxəssis hər iki oyunu komandası üçün həyati əhəmiyyətli mühüm matç adlandırıb.
O bildirib ki, müxtəlif klublardan dəvət etdiyi futbolçular yığmada bir bayraq altında birləşməlidirlər. Konte bu açıqlamanı İtaliya A seriyasının ötən turunun böyük polemikalara yol açan "Yuventus" - "Roma" matçı fonunda verib. Baş məşqçinin sözlərinə görə, futbolçular ayrı-ayrı klubların heyətində rəqib qismində bir-birilərinə qarşı vuruşaraq, qələbə üçün hər şey edə bilərlər. Amma milliyə gələndə bir bayraq, bir məqsəd altında birləşmək lazımdır: "Ölkəni təmsil etmək çox şeydən vacibdir. Biz çempionatda ab-havanı yaxşılaşdırmağa çalışacağıq. İndi isə mühüm həyati 2 oyun barədə düşünməliyik".
Qeyd edək ki, İtaliya və Azərbaycan yığmaları oktyabrın 10-da Palermodakı "Rentso Barbera" stadionunda Bakı vaxtı ilə saat 23:45-də üz-üzə gələcəklər. Bundan 3 gün sonra millimiz Xorvatiyanın, "Skuadra Adzurra" isə Maltanın qonağı olacaq.
