Ukraynanın "Çernomorets" klubunun rəhbərliyi baş məşqçi Roman Qriqorçukun "Qəbələ"nin sükanı arxasına keçəcəyindən xəbərsizdir. Sportnet.az-ın məlumatına görə, Odessa təmsilçisinin baş direktoru Sergey Kernitski "XSport"a açıqlamasında məşqçilər heyətinin hazırda məzuniyyətdə olduğunu bildirib.
O, məşqçilər heyətinin komandanı buraxıb getmədiyini iddia edib: "İstefa və ya qovulma barədə informasiyanı kimin yaydığını bilmirəm. Bu xəbəri yazan, yəqin ki, ətraflı izahat da verə bilər. Mənim cavabım isə belədir: hazırda məşqçilər məzuniyyətdədirlər".
Qeyd edək ki, Roman Qriqorçuk bu gün "Qəbələ" və "Qarabağ" komandaları arasında keçirilmiş Topaz Premyer Liqasının XVI tur qarşılaşmasını izləyib. "Qəbələ"nin vitse-prezidenti Fariz Nəcəfov ukraynalı mütəxəssislə ilyarımlıq müqavilənin imzalanacağını bildirib. Ukrayna Premyer Liqasında dekabrın 7-dən gələn il fevralın 28-dək qış fasiləsi elan olunub.
