"Xəzər Lənkəran"ın heyətində kollektiv məşqlərə başlayan Adrian Skarlatake yenidən problemlə üzləşib. Klubdan Sportnet.az-a verilən məlumata görə, rumıniyalı müdafiəçi ötən gün "Dalğa Arena"da baş tutan məşqin sonunda ayağında ağrılar hiss edib.
Nəticədə o, komanda ilə birgə hazırlıqdan kənarlaşdırılıb. Köhnə zədəsini təzələyən təcrübəli futbolçu sabah "İnter"lə Azərbaycan Kubokunun ilk 1/4 final matçında böyük ehtimalla oynamayacaq. Əvəzində Tural Cəlilovun sağalaraq, komanda ilə birgə məşqlərə başlaması məşqçilər heyətini sevindirib.
Qeyd edək ki, "Xəzər Lənkəran" "İnter"lə oyun öncəsi son məşqinə bu gün "İnter Arena"da çıxacaq. Görüş isə martın 4-də saat 17:00-da başlanacaq.
