Bakının "İnter" futbol komandasının baş məşqçisi Kaxaber Tsxadadze Gürcüstana yollanıb. Sportnet.az-ın məlumatına görə, əvvəlcə 47 yaşlı mütəxəssis paralel rəhbərlik etdiyi qonşu ölkə yığmasının Malta ilə yoldaşlıq görüşü və Almaniyaya qarşı AVRO-2016-nın seçmə qrup matçı ilə əlaqədar mətbuat konfransı keçirib.
Daha sonra o, Kutaisiyə yollanaraq, yerli "Torpedo" komandasının "Samtredia" ilə ölkə kubokunun 1/4 final mərhələsindəki cavab görüşünü izləyib. Tsxadadze Bakıya bu axşam qayıdacaq. Ona görə də "İnter"in bugünkü məşqçi köməkçi-məşqçi Zaur Svanadzenin rəhbərliyi altında baş tutacaq.
Gürcüstan yığmasına dəvət alan futbolçular isə martın 21-də bir araya gələcək. 29 nəfərlik siyahıda "İnter"in oyunçusu da yer alıb. Malta ilə qarşılaşma martın 25-də, Almaniya ilə oyun isə martın 29-da keçiriləcək.
Qeyd edək ki, Kaxaber Tsxadadze iyunun 1-dək həm yığmada, həm də klubda fəaliyət göstərəcək. Ardından o, "İnter"i tərk edərək, bütün diqqətini Gürcüstan millisinə yönəldəcək.
