Zaqatalada "Simurq" və "Bakı" klubları arasında keçiriləcək matçın baş tutmasında heç bir problem yoxdur. Bu barədə Sportnet.az-a "Bakı"nın icraçı direktoru Yaşar Seyidov açıqlama verib.
Onun sözlərinə görə, "Bakı"nın əsas komandası dünən axşamdan Şimal-Qərb bölgəsindədir. Komanda üzvləri Balakəndəki "Qubek" otelində məskunlaşaraq, oyun saatını gözləyirlər.
Oyundan öncə "Bakı"nın Zaqatalaya gedişi sual altına düşmüşdü. Səbəb kimi klubdakı maliyyə problemləri göstərilirdi. Hətta əvəzedici komanda dünən keçirilməli olan əvəzedicilərin oyununa gedə bilməmişdi. Seyidov texniki məğlubiyyətə hazır olduqlarını söyləyib.
Qeyd edək ki, "Simurq" - "Bakı" matçı bu gün saat 17:00-da start götürəcək.
