Bu gün Cənubi Koreyanın Pxençxan şəhərində keçirilən XXIII Qış Olimpiya Oyunlarının bağlanış mərasimində Azərbaycanın bayrağını könüllü daşıyacaq.
Sportnet.az xəbər verir ki, bu barədə "Report” Azərbaycanın şef de-missionu Anar Bağırov bildirib. O, deyib ki, bu gün Bakıya yola düşdükləri üçün Azərbaycan nümayəndə heyəti bağlanış mərasimində iştirak etməyəcək.
Keçid zamanı Azərbaycanla yanaşı, Livan, Lixtenşteyn, Keniya, Sinqapur, Özbəkistan, İran, Hindistan, Makedoniya, Macarıstan və Honkonqun da bayraqlarını könüllülər aparacaqlar.
Buna səbəb Azərbaycan kimi, adları qeyd olunan ölkələrin də nümayəndə heyətlərinin artıq Cənubi Koreyanı tərk etmələridir.
Bağlanış mərasimində Rusiya idmançılarının çıxış etdikləri Beynəlxalq Olimpiya Komitəsinin bayrağını da könüllü tutacaq.
Qeyd edək ki, bağlanış mərasimi Bakı vaxtı ilə saat 15:00-da start götürüb. Açılışda Azərbaycanın bayraqdarı Oyunlarda ölkənin yeganə təmsilçisi olan xizəksürən Patrik Braxner idi. O, çıxış etdiyi slalom yarışında yıxıldığı üçün finiş xəttinə çata bilməyib.
