Ağasəlim Mircavadov DÇ-2014-ə proqnoz verdi

Azərbaycanın ən təcrübəli məşqçisi Ağasəlim Mircavadov Braziliyada keçiriləcək dünya çempionatına dair proqnoz verib. Sportnet.az-a danışan mütəxəssisin fikrincə, finalda meydan sahibləri ilə dünya çempionları üz-üzə gələcək.

Milli komandamızın sabiq baş məşqçisi turnirdə 2 komandanın sürpriz edə biləcəyini vurğulayıb: "Demək olar Braziliyada çıxış edəcək bütün yığmaların oyunlarını izləmişəm. Ancaq uğurlarına adət etdiyimiz milli komandalarla yanaşı, Qana və Belçika komandalarından sürpriz gözləyirəm”. Daha sonra Mircavadov 1/8 finala yüksələcək və bu mərhələdə qarşılaşacaq cütlüklərlə bağlı proqnozunu verib:

Braziliya – Hollandiya, Kolumbiya – İngiltərə, Fransa – Nigeriya, Almaniya – Rusiya, İspaniya – Xorvatiya, Kot-d’İvuar – İtaliya,Argentina – İsveçrə, Belçika - Qana.

Təcrübəli mütəxəssis 1/8 finalın ilk cütlüyü ilə bağlı proqnoz verməzdən öncə "Bu oyunu finala bərabər tuturam. Ancaq yenə də braziliyalı futbolçuların fərdi ustalığını nəzərə alaraq, hesab edirəm ki, "narıncılar”ı üstələməyi bacaracaqlar”, - fikrini irəli sürüb.

Mundialın ¼ final mərhələsindəki cütlüklərə gəldikdə isə, ekspertin daha çox diqqətini çəkən oyun İspaniya – İtaliya olub: "İtaliyanın heyətində Pirlo kimi "beyin” var. Çox gərgin oyun gözləyirəm. Ancaq "Skuadra Adzurra”nın qalib gələcəyinə inanmağım gəlmir. Yox, ispanlar bu mərhələni də adlaya biləcəklər”.

¼ final

Braziliya – İngiltərə, Fransa – Almaniya, İspaniya – İtaliya, Argentina– Belçika.

Maraqlıdır ki, Mircavadov yarımfinal cütlükləri ilə bağlı fikirlərini tərəddüd etmədən bildirib.

½ final

Almaniya – Braziliya, İspaniya – Argentina.

3-cü yer uğrunda görüş

Almaniya – Argentina

Final

Mütəxəssisin fikrincə, həlledici görüşdə meydan sahibləri daha şanslıdırlar: "Meydan amili öz sözünü deməlidir. Braziliya doğma azarkeşləri önündə 6-cı dəfə dünya çempionu tituluna yiyələnmək üçün ikiqat əzmlə vuruşacaq. İnanmıram ki, ispanlar bu təzyiqə tab gətirsinlər”.

Braziliya - İspaniya