ABŞ-də yaşayan azərbaycanlı peşəkar hokkeyçi Danial Caniyev (Danny Dzhaniyev) iyunun 29-da “Ocaq Sport” Klubunun gənc hokkeyçiləri ilə görüşəcək və onlara ustad dərsi keçəcək.
Klubdan Sportnet.az-a verilən məlumata görə, görüş Heydər Əliyev adına İdman-Konsert Kompleksinin Buz Meydançasında baş tutacaq.
Danial Caniyev hazırda ABŞ-nin nüfuzlu "Penn State University" komandasının aparıcı oyunçularındandır. O, Amerika Hokkey Federasiyası sistemində yetişib, müxtəlif beynəlxalq turnirlərdə iştirak etmiş və yüksək nəticələr göstərib.
Valideynləri azərbaycanlı olan Danial milli köklərinə bağlılığını daim vurğulayır və ilk dəfə olaraq Azərbaycanda uşaqlarla görüş keçirəcək.
