Cüdo üzrə Azərbaycan milli komandasının sabiq baş məşqçisi Peter Zayzenbaxer həbs olunub. Sportnet.az-ın məlumatına görə, 57 yaşlı mütəxəssis Ukrayna polisi tərəfindən aparılmış 7 aylıq axtarışlardan sonra Kiyevdə saxlanılıb.
Xüsusi təyinatlı silahlı polislər onun qaldığı mənzilə hücum edərək, alt paltarında divanda yaxalayıblar. Zayzenbaxer yetkinlik yaşına çatmayan bir neçə qıza seksual zorakılıqda ittiham olunur. Avstriyalı sabiq cüdoçu 1984-cü il Los-Anceles və 1988-ci il Seul Yay Olimpiya Oyunlarında qızıl medal qazanıb. İdmançı karyerasını başa vurduqdan sonra o, Vyanada cüdo klubunda məşqçi kimi çalışıb. 1997-ci ildə Zayzenbaxer 10, 2011-ci ildə 2003-cü ildə 13 yaşlı qızlara qarşı bir neçə dəfə cinsi zorakılıq edib. Bundan illər keçdikdən sonra həmin qadınlar ikiqat olimpiya çempionuna qarşı iddia qaldırıblar. 2016-cı ilin dekabrında Vyana məhkəməsində dinləmələr başlanılıb. Lakin Zayzenbaxer məhkəmənin çağırışına məhəl qoymadan gizlənib. Həbsinə beynəlxalq order verilsə də, onu tapmaq mümkün olmayıb.
Nəhayət, təhqiqatçılar bu yaxınlarda Zayzenbaxerin izinə düşərək, onun Vyanadakı anası ilə telefon danışıqlarını dinləyiblər. Bunun əsasında məşhur idmançının yeri müəyyənləşib. Ötən gün həyata keçirilmiş əməliyyat nəticəsində Zayzenbaxer ələ keçirilib. Avstriya hökuməti onun ekstradisiyası ilə bağlı Ukraynaya sorğu göndərib. Günahı sübuta yetirilsə, Zayzenbaxeri 10 ilədək həbs gözləyir.
Qeyd edək ki, Peter Zayzenbaxer Azərbaycan millisində iki dəfə baş məşqçi kimi çalışıb. Onun ilk rəhbərliyi 2012 - 2014-cü illərə təsadüf edib. 2015-ci ildə Elxan Məmmədov ölkə tarixində ilk dəfə dünya çempionu olub, Orxan Səfərov isə bürünc medala yiyələnib. Növbəti qayıdış 2015-ci ilin sentyabrında baş tutub. Bu dəfə Azərbaycan cüdoçuları 2016-cı il Rio-de-Janeyro Yay Olimpiya Oyunlarında 2 gümüş medala sahib olublar. Həmin medalları Rüstəm Orucovla Elmar Qasımov qazanıb. Zayzenbaxerin işinin məhkəmədə olduğu üzə çıxdıqdan sonra Azərbaycan Cüdo Federasiyası araşdırmalar yekunlaşanadək onunla müqaviləni dayandırıb.
