Fransanın paytaxtı Parisdə güləş üzrə dünya çempionatına start verilib.
Sportnet.az-ın məlumatına görə, ilk yarış günündə 71 kq, 75 kq, 85 kq və 98 kq çəki dərəcələrində yer alan yunan-Roma güləşçiləri qüvvələrini sınayıblar.
Azərbaycan bu çəkilərin hamısında təmsil olunsa da, günü medalsız başa vurub. Onlardan ən yüksək nəticəni "Bakı 2017" IV İslam Həmrəyliyi Oyunlarının qalibi İslam Abbasov (85 kq) göstərib. Abbasov Peru və Yaponiyadan olan rəqiblərini mübarizədən kənarlaşdırsa da, 1/4 finalda Almaniya təmsilçisinə uduzub. Rəqibin finala yüksəlməsi ilə təsəlliverici görüşə qatılan Abbasov burada Kuba idmançısı ilə gərgin keçən görüşü üstün tamamlayıb və bürünc medal uğrunda görüşə vəsiqə qazanıb. Həlledici görüşdə İslam Abbasov İran idmançısına uduzub və ilk dəfə qatıldığı böyüklər arasında Dünya çempionatını beşinci sırada tamamlayıb.
2015-ci ildə keçirilmiş son dünya çempionatının qalibi Rəsul Çunayev (71 kq) 7-ci yerlə kifayətlənib. 2010-cu ilin Avropa və dünya çempionu Həsən Əliyev (75 kq) elə ilk görüşdəcə, İslamiadanın digər qalibi Orxan Nuriyev (98 kq) ikinci qarşılaşmasında uduzaraq, mübarizəni dayandırıb.
Dünya çempionatı
71 kq
Təsəlliverici görüş. Rəsul Çunayev - Mohammadali Abdolhamid Gerayi (İran) - 7:8
Təsəlliverici görüş. Rəsul Çunayev - Pavel Lyax (Belarus) - 8:4
Təsəlliverici görüş. Luis Alfredo De Leon (Dominikan Respublikası) - Rəsul Çunayev - 0:8 (1.28 dəq)
1/16 final. Rəsul Çunayev - Frank Stabler (Almaniya) - 1:2
1/32 final. Rəsul Çunayev - Jefrin Benito Mexia Sambula (Macarıstan) - 8:0 (1.37 dəq)
75 kq
1/16 final. Həsən Əliyev - Şohey Yabiku (Yaponiya) - 0:4
85 kq
Bürünc medal görüşü. İslam Abbasov - Hosseyn Ahmad Nuri (İran) - 0:4
Təsəlliverici görüş. Daniel Qriqoriç Heçavarria (Kuba) - İslam Abbasov 2:2*
1/4 final. Denis Maksimilian Kudla (Almaniya) - İslam Abbasov (A xalçası) - 4:1
1/8 final. Atsuşi Matsumoto (Yaponiya) - İslam Abbasov - 1:4
1/16 final. Rikardo Dieqo Kardenas Esquen (Peru) - İslam Abbasov - 1:7
98 kq
1/8 final. Melonin Numonvi (Fransa) - Orxan Nuriyev (D xalçası) - 3:1
1/16 final. Kevin Mexia Kastilyo (Honduras) - Orxan Nuriyev - 1:6
Qeyd edək ki, dünya çempionatı avqustun 26-dək davam edəcək.
