Yaxın günlərdə Rəşid Məmmədbəyovun xatirəsinə həsr olunan yeniyetmə güləşçilərin Respublika turnirinin seçim xarakterli zona yarışları start götürəcək. Sportnet.az-ın məlumatına görə, seçim yarışlarının Dünya Güləş Birliyinin yeni qaydalarına uyğun keçirilməsi və görüşlərin idarə edilməsində hakimlərin təlimatlandırılması məqsədilə Olimpiya Güləş Mərkəzində milli və beynəlxalq dərəcəli hakimlər üçün növbəti seminar keçirilib.
Azərbaycan Güləş Federasiyasının Hakimlər Kollegiyası tərəfindən aparılan seminarda Dünya Güləş Birliyinin yeni təlimatları və qaydaları barədə hakimlər məlumatlandırılıb, bu günlərdə Özbəkistanın paytaxtı Daşkənddə keçirilmiş dünya çempionatından videogörüntülər izlədilərək qaydalar izah edilib. Mübahisəli məqamlar monitorda göstərilərək müzakirə edilib. Seminar zamanı, bir neçə ay əvvəl III dərəcəli beynəlxalq hakim almaq üçün imtahandan keçmiş 5 milli dərəcəli hakimə Dünya Güləş Birliyinin lisenziya vəsiqələri, hakim qalstuku, qolçağı və fit hədiyyə edilib.
Hakimlərə vəsiqələri təqdim edən Azərbaycan Güləş Federasiyasının baş katibi Əjdər Cəfərov onları təbrik edib, gələcək fəaliyyətlərində uğurlar arzulayıb: "Digər milli dərəcəli hakimlərə isə, tövsiyyə edirəm ki, güləş qaydalarını dərindən mənimsəyib, öz üzərlərində işləsinlər, xarici dil biliklərini artırsınlar. Belə olan halda onlar da növbəti imtahanlarda iştirak edib, beynəlxalq dərəcə qazanar, ölkəmizi beynəlxalq yarışlarda təmsil edə bilərlər".
