"Neftçi" klubunun futbolçusu Samir Məsimov Sloveniyanın "Domjale" klubu ilə 3 illik müqavilə bağlayıb. Sportnet.az-ın məlumatına görə, 21 yaşlı yarımmüdafiəçi "Xəzər TV"yə açıqlamasında yeni komandasına keçidindən danışıb.
O, "Neftçi" kimi klubda oynadığı üçün fəxr hissi keçirdiyini bildirib: "Hələ Rusiyada çıxış etdiyim vaxt Azərbaycanda yalnız bu klubda oynayacağımı, oradan isə Avropaya yollanacağımı qətiləşdirmişdim. Keçidə mane olmadıqları üçün "Neftçi" rəhbərliyinə, həmçinin, dəstəyə görə AFFA-ya minnətdaram".
Məsimov yeni klubu və Sloveniya futbolu barədə də fikirlərini bölüşüb, "Domjale"də hədəflərini açıqlayıb: "Moskva "Lokomotiv"ində ikən Sloveniyada təlim-məşq toplanışı keçmişdik. "Neftçidə olarkən Avropa Liqasında "Koper"lə qarşılaşmışıq. "Domjale"nin güc futbolu sərgilədiyini bilirəm. Özümə inanıram. Əminəm ki, hər şey alınacaq. Azərbaycanı təmsil edəcəyimə görə xoşbəxtəm. Çalışacağam ki, Avropada Azərbaycanda maraq göstərilməli futbolçuların olduğunu görsünlər. Sloveniyaya tramplin gözü ilə baxıram. Qısa zamanda geri dönmək fikrim yoxdur. Ən əsası, milli komanda mənim üçün qürur mənbəyidir. "Domjale"də əsas heyətdə oynayıb yığmaya çağırılmaq istəyirəm".
Qeyd edək ki, Samir Məsimov "Domjale"yə azad agent kimi yollanıb.
