Türkiyə millisinin ulduz futbolçusu və hazırda Çinin "Pekin Quoan" klubunda oynayan Burak Yılmazın meneceri Ogan Tarhanın müsahibəsi
- Dünyanın iqtisadi böhran bürüdüyü halda Çin futbol bazarında böyük canlanmanın səbəbi nədir?
- Çin klubları futbollarından söz etdirmək üçün Avropada az-çox parlamış oyunçuları öz liqalarına cəlb edirlər. Daha doğrusu rəqabət yaratmaqla güclü çempionat qurmaq fikrindədirlər. Ona görə də böyük pullar xərclənilir. Çin iqtsadiyyatı hamımıza bəllidir. Onların maliyyə durumu indiki halda belə pis deyil.
- Burak Yılmazı siz Çinə apardınız. Hədəfdə başqa futbolçular varmı?
- Burak forvard idi və ona ehtiyac vardı. Bu səbəbdən də "Pekin Quoan” klubu onu istədi. Transferi həll etdik. Əslində Türkiyədən daha çox futbolçu bu ölkəyə gedə bilər. Amma orda da legioner limiti hər şeyə mane olur.
- Çin klubları bu oyunçuları almaqla daha çox reklam olunurlar...
- O da səbəblərdən biridir. Amma daha çox rəqabət istəyirlər.
- Azərbaycan futbolu haqqında nə bilirsiniz?
- Azərbaycan futbolu ilə daha yaxından maraqlanmaq istərdik. Əslində bir neçə il öncə sizin futbolçular sıx-sıx Türkiyə birinci liqasına gəldiyi üçün izləyirdik. Amma indi vəziyyət fərqlidir. Milli komandanızın bir neçə oyununu izlədim. Məsələn, orada elə oyunçular var ki, xaricdə legioner həyatı yaşamalıdırlar.
- Azərbaycanlı futbolçular Çində çıxış edə bilərlər?
- İndiki vəziyyətdə Çin klublarının onları alması çətin görünür. Çünki bu komandalar yüksək səviyyəli transferlər edirlər. Azərbaycanlı futbolçular ora getmək üçün əvvəlcə Avropada özlərini göstərməlidirlər.
- Avropa çempionatlarına getmək bizim oyunçular üçün çətindir...
- Amma aşağı səviyyəli liqalardan başlaya bilərlər. Bir çox ölkələr var ki, Azərbaycan çempionatından çox da üstün deyil. Ordan başlamaq, diqqət cəlb etmək olar.
- Ölkəmizdə tanıdığınız oyunçu var?
- Mən Vaqif Cavadovu illər öncə bəyənmişdim. Bizim milli komandaya qarşı çox yaxşı çıxış etmişdi. O, Türkiyəyə gələndə yenidən parlayacaq deyə düşündüm. Amma olmadı. Bilirsiniz, azərbaycanlı menecerlər də sizin oyunçuları xaricə aparmaq üçün çalışmalıdırlar. Sizin futbolçuların legioner həyatı yaşaması onların əlindədir (qafqazinfo.az).
