Bu gün Çempionlar Liqasının (ÇL) pley-off mərhələsində mübarizəyə başlayacaq "Arsenal” 1/8 finalın uğursuz komandasıdır. Sportnet.az-ın məlumatına görə, Arsen Vengerin komandası 2010-cu ildən bu yana 1/4 finala yüksələ bilmir.
Maraqlıdır ki, "topçular” sonuncu dəfə həmin mərhələdə məhz "Barselona” ilə görüşüb və mübarizəni dayandırıb – Londonda 2:2, Barselonada 4:1. "Nou Kamp”dakı matçda bütün 4 qolun müəllifi Kataloniya təmsilçisinin lideri Lionel Messi olub.
Komandalar növbəti mövsüm artıq 1/8 finalda üz-üzə gəlib. Evdə 2:1 hesablı qələbə qazanan "Arsenal” səfərdə 1:3 hesabı ilə uduzduğundan, "Barsa” cütün qalibi olub. "Topçular" həmin 2011-ci ildən bu yana 1/8 final sindromunu qıra bilmir.
"Arsenal”la "Barselona”nın ən yaddaqalan dueli isə 2006-cı ildə ÇL-in finalında olub. Parisdəki "Stad de Frans”da keçirilən matç ispaniyalıların 2:1 hesablı əzmkar qələbəsi və turnir indiki adını (əvvəl Çempionlar Kuboku idi) alandan sonra ilk qalibiyyəti ilə nəticələnib. Göründüyü kimi, "Barsa” "topçular” üçün arzuolunmaz rəqiblərdən sayılır. Üstəlik, Kataloniya təmsilçisi 1/8 finalda uğurlu çıxış edir və ardıcıl 9-cu dəfə 1/4 finala çıxmağa iddialıdır. Luis Enrikenin komandası, bütün turnirləri nəzərə alsaq, artıq 32 oyundur məğlub olmur. Bütün bunlar "Arsenal” üçün "qorxunc statistika” sayılmalıdır.
Enrikenin özü də "topçular”ı, onun 20 illik baş məşqçisi olan fransalı həmkarı Arsen Vengeri məyus edə bilib. Təbii ki, bu, futbolçu vaxtında olub. O, "Barsa”da oynayarkən ÇL-in 1999/2000 mövsümündə qrup mərhələsində "Arsenal”a həm "Nou Kamp”da (1:1), həm də "Uembli”də (4:2) qol vurmağa müvəffəq olub. Venger isə hələ vətənində, "Monako”da işlədiyi zamanı – 1993/1994 mövsümündə qrupda "Barsa”ya hər 2 oyunda (evdə 0:1, səfərdə 0:2) uduzub.
Daha bir maraqlı fakt Petr Çex - Lionel Messi duelləriilə bağlıdır. Məlumdur ki, Çex uzun illər çıxış etdiyi "Çelsi”nin heyətində "Barsa” ilə ÇL-də dəfələrlə görüşüb, qələbə sevinci də yaşayıb, məğlubiyyət acısı da dadıb. Ancaq 34 yaşlı çexiyalı qapıçı argentinalı hücumçuya qarşı keçirdiyi 6 oyunun hamısında ondan qol buraxmayıb. Yəni, Çex Messinin qol vura bilmədiyi azsaylı qapıçılardandır.
Hər iki komandanın heyətində çoxlu tanış futbolçu, yığmada komanda yoldaşları var. "Arsenal”ın çilili "qol silahı” Aleksis Sançes "Barsa”da 3 il (2011 - 2014; 141 oyun, 47 qol) oynayıb və oradan indiki komandasına keçib. Təbii ki, Sançes İspaniyada ölkə çempionluğu, ölkə kubokunun qalibi kimi mükafatlar qazanıb. "Barsa”nın belçikalı müdafiəçisi Tomas Vermalen isə 2009 - 2014-cü illərdə "Arsenal”ın şərəfini qoruyub və İngiltərə Premyer Liqasında 110 matç keçirib. O, 2014-cü ildə "Barsa”ya keçərkən, Sançes əks marşrutla "Arsenal”a transfer olub.
Mehman SÜLEYMANOV
