Klublar Komitəsinin bu gün keçirilən iclasından sonra "Qəbələ” klubunun vitse-prezidenti Fariz Nəcəfov jurnalistlərin suallarını cavablandırıb. Sportnet.az həmin müsahibəni təqdim edir.
- Çempionatın son turunda "Xəzər Lənkəran”la oyunda xal itirdiniz. Ümumiyyətlə, qış fasiləsindən sonra "Qəbələ”nin çıxışı sizi qane edirmi?
- Toplanışı yüksək səviyyədə keçmişdik. Mən də həmin vaxt komanda ilə birlikdə idim. İlk görüşdə "Kəpəz”ə məğlub olduq, bundan sonra komanda ilə görüşlər oldu. Futbolçularda psixoloji gərginlik var idi. Bu, aradan qaldırıldı. Sonrakı oyunda isə qalib gəldik. Əvvəllə müqayisədə fərq ondadı ki, indi hücum xəttimiz yaxşı çıxış etmir, zəiflik var. Bunun da səbəbi odu ki, 2 əsas oyunçumuz – Dodo və Aleksey Antonov son vaxtlar komandaya kömək edə bilmir. "Xəzər Lənkəran”la matçda üstün tərəf biz olsaq da, qol vura bilmədik. İnanıram ki, həmin futbolçularımız geri qayıdandan sonra bu məsələ yoluna qoyulacaq.
- Uğursuz nəticələr davam etsə, baş məşqçi Roman Qriqorçukun istefaya göndərilmək ehtimalı varmı?
- Bu sual son vaxtlar tez-tez qabardılır. Qriqorçukla müqaviləni 1 il artırdıq. Onun burada olduğu müddətdə kifayət qədər yaxşı nəticə göstərdik. Savadına, məşqçilik qabiliyyətinə şübhəmiz yoxdu. Hər xal itirdiyimiz oyundan sonra onun istefası gündəmə gəlir. Birdəfəlik bildirirəm ki, Qriqorçukun getməsi gündəmdə deyil. Nə vaxt görsək ki, komanda və futbolçularla arasında problem var, məşqinə məsuliyyətsiz yanaşır, nəticələrində kifayət qədər pisdi və istəyimizə çata bilmirik, o zaman bu barədə düşünmək olar. Bu gün sözügedən məsələ müzakirə oluna bilməz. Komanda 4 oyuna 10 xal toplayıb. Razıyam, biz istərdik ki, ilk pillədə olaq, amma bu, futboldu. Qarşıda bir neçə tur var.
- İndiki məqamda birincilik sizin üçün xəyal kimi görünmür?
- Niyə xəyaldı ki? Liderlə 10 xallıq fərqimiz var. Qarşıdakı 13 turda isə 39 xal toplamaq mümkündü. Sadəcə, inanıb, komanda şəkildə nəticə qazanmaq lazımdı.
- Sabah ölkə kubokunun ¼ final mərhələsində "Zirə” ilk oyuna çıxacaqsınız. Yəqin ki, kuboku qazanmaq arzusundasınız...
- Sözsüz, kubok oyunları çempionat görüşlərindən fərqlənir. Qalib olmaq niyyətindəyik.
