"Qəbələ” ardıcıl 6-cı, tarixində 8-ci dəfə Azərbaycan kubokunun 1/4 final mərhələsində mübarizə aparacaq. Sportnet.az-ın klubun rəsmi saytına istinadən məlumatına görə, yalnız 3 dəfə yarışı tez başa vuran "qırmızı-qaralar” 4-cü dəfə yarımfinala adlamağa çalışacağıq. Bunun üçün Roman Qriqorçukun yetirmələri "Zirə” səddini keçməlidir.
Komandalar arasında ölkə kubokunda ilk matç "Qəbələ” üçün bir neçə yubileylə əlamətdar olacaq. Turnirdə 44-cü oyununu keçirəcək qəbələlilər 20-ci səfər matçında qüvvəsini sınayacaq. İndiyədək ölkə kubokunda rəqib meydanlarında 19 matç keçirən "qırmızı-qaralar” 7 qələbə qazanıb, 6 heç-heçə edib və 6 dəfə uduzub. 22 qol vuran, 21 top buraxan "Qəbələ” son 6 səfərdən məğlubiyyətsiz qayıdıb. Ümumilikdə isə 43 kubok qarşılaşmasında 20 qələbə, 14 heç-heçə və 9 məğlubiyyət qeydə alınan "Qəbələ” 65 qol vurub, 35-ni buraxıb. Zirədəki görüş klub tarixinin 190-cı səfər matçıdır ki, bu qarşılaşmada 70-ci qələbə əldə oluna bilər.
Kubok matçı bəzi oyunçular üçün yubiley xarakteri daşıyır ki, onlar bunun üçün meydana çıxmalıdır. Zirədəki qarşılaşmada iştirak etsə, Rafael Santos "Qəbələ”də 75-ci, Dodo kubokda 15-ci matçını keçirəcək.
