Futbol üzrə Azərbaycan Kubokunun daha iki yarımfinalçısı müəyyənləşib. Sportnet.az-ın məlumatına görə, bunlar "Qarabağ" və "Qəbələ" klublarıdır.
İlk oyunda "Sumqayıt"ı 2:0 hesabı ilə məğlub edən "Qarabağ" cavab matçında rəqib qapısından 4 top keçirib. "Sumqayıt" bu qolların yalnız birinə cavab verib. Bununla da Qurban Qurbanovun rəhbərlik etdiyi komanda adını yarımfinala yazdırıb. "Qarabağ" yarımfinal mərhələsində Bakının "İnter" klubu ilə qarşılaşacaq.
"Qəbələ" isə 1/4 finalda "Zirə" səddini keçməyi bacarıb. Zirədə keçirilmiş ilk görüşdən 2:1 hesablı qələbə ilə ayrılan Roman Qriqorçukun komandası doğma azarkeşlər önündə rəqibini darmadağın edib - 5:1. "Qəbələ"nin yarımfinaldakı rəqibi isə "Neftçi" - "Xəzər Lənkəran" cütünün qalibi olacaq.
Qeyd edək ki, ilk yarımfinalçı "Rəvan"ı iki oyunun cəmində üstələyən "İnter" olub. Növbəti mərhələnin görüşləri aprelin 27-də, cavab oyunları isə mayın 4-də keçiriləcək.
