"Cari mövsümdə "Qarabağ”la iki dəfə qarşılaşmışıq. Bu üzdən bir-birimizi yaxşı tanıyırıq. Son matçda komandamın qoluna mən imza atmışdım. Yenə onların qapısına qol vuracağıma inanıram”. Sportnet.az-ın məlumatına görə, bu fikirləri "Qəbələ”nin futbolçusu Ermin Zets klubun rəsmi saytına açıqlamaısnda deyib.
"Qırmızı-qara” formada keçirdiyi 28 oyunda 7 dəfə fərqlənən bosniya və herseqovinalı hücumçu liderlə görüşdə yenə qol vurmağa iddialı olduğunu bildirib: "Əlbəttə, bizi çox çətin oyun gözləyir. Çünki "Qarabağ” ölkənin ən yaxşı komandalarından biridir. Onlar bunu mövsümün arxada qalan hissəsində də göstəriblər. Biz əksər oyunlarda imkanlarımızdan istifadə edə bilməmişiksə, "Qarabağ” bütün şanslardan yararlanıb və bu üzdən Premyer Liqanın lideridir. Biz bu qarşılaşmaya qələbə qazanmaq üçün çıxacağıq. Əminəm ki, bunu bacara bilərik. Bu, bizim üçün çox vacib oyundur. Doğma meydanımızda oynamağımız da bizə əlavə üstünlük verir. Qalib gəlib, azarkeşlərimizi də sevindirməliyik”.
Zets son turun "Zirə” ilə ev oyunundakı 1:2 hesablı məğlubiyyət və bu üzdən də qalib gəlməli olduqlarını da qeyd edib: "Zirə”yə məğlubiyyətdən sonra 3 xal qazanıb, öz yolumuza uğurla davam etdirmək istəyirik. Həmin matça gəlincə, belə olmamalı idi. Belə məğlubiyyəti qəbul etmək də çox çətindir. Bütün oyunu daha yaxşı oynasaq da, sonda məğlub olduq. Bu halla ilk dəfə rastlaşmırıq. Dəfələrlə daha yaxşı çıxış etdiyimiz matçlarda xallar itirmişik. Belə məğlubiyyət azarkeşlərimiz, özümüz, hamı üçün çox gözlənilməz oldu. Həmin uğursuz oyundan sonra bütün futbolçular meydanda var qüvvəsini qoyacaq ki, qələbə qazanaq. Nəyə qadir olduğumuzu göstərmək üçün qalib gəlməliyik”.
