Bu gün futbol üzrə Azərbaycan Kubokunun yarımfinal mərhələsinin cavab oyunları keçiriləcək. Sportnet.az-ın məlumatına görə, qarşılaşmalardan biri Masazırda, digəri isə Qəbələdə baş tutacaq.
İlk olaraq "Qəbələ" Bakının "Neftçi" klubunu qəbul edəcək. Qarşılaşmanın ədalət təmsilçisi Fariz Yusifov olacaq. Paytaxtda keçirilmiş ilk oyunda 1:1 hesabı qeydə alındığından meydan sahiblərinə qələbədən əlavə qolsuz bərabərlik də sərf edir. "Ağ-qaralar" isə finala yüksəlmək üçün səfərdən ya qələbə, ya da ən azından 2:2 hesablı bərabərliklə dönməlidir. Komandalar bugünədək Azərbaycan Kubokunda son oyun istisna olmaqla cəmi bir dəfə üz-üzə gəlib. İki il əvvəl finalda görüşən komandalar meydanı bərabərliklə tərk edib - 1:1. Oyunun taleyini penaltilər seriyası həll edib və daha dəqiq olan "Neftçi" kuboka sahib çıxıb.
Bakının "İnter" klubu isə səfərdə "Qarabağ"la qarşılaşacaq. Ramil Diniyevin idarə edəcəyi oyun Abşeron rayonunun Masazır qəsəbəsindəki "Əlincə Arena"da keçiriləcək. Demək olar ki, Premyer Liqada çempionluğu təmin etmiş Qurban Qurbanovun rəhbərlik etdiyi komanda finala yüksələcək. "Qarabağ" ilk oyunda rəqib qapısından 4 cavabsız top keçirib. Yarımfinal mərhələsinin ilk oyunu istisna olmaqla komandalar bugünədək Kubok oyunlarında 5 dəfə qarşılaşıb. Hərəyə iki dəfə qələbə qazanan yarımfinalçılar bir dəfə meydanı sülhlə tərk ediblər. Kubokda 3 dəfə yolları kəsişən komandalar 5 oyunda qüvvələrini sınayıblar. 1/8 və 1/4 finala təsadüf edən duellərdə iki oyunun yekununda "İnter" qalib gəlib. Yeganə final matçında isə "Qarabağ" üstün olub.
Azərbaycan Kuboku, yarımfinal mərhələsi, cavab oyunları
"Qəbələ" – "Neftçi" - 1:1 (ƏLAVƏ VAXT - 0:0, penaltilərlə - 3:4)
Qol: Ermin Zets, 76 - Ruslan Qurbanov, 59
Penalti seriyası:
Aleksey Qay - 1:0
Erik Ramos - 1:1
Aleksey Antonov - 2:1
Jairo Rodriges - 2:2
Ermin Zets - 3:2
Araz Abdullayev - 3:3
Vitali Vernidub - 3:3 (qapıçı)
Anyete - 3:3 (qapıçı)
Samir Zərgərov - 3:3 (qapının üstündən)
Ruslan Qurbanov - 3:4
Hakimlər: Fariz Yusifov, Yaşar Abbasov, Namiq Hüseynov, Rəvan Həmzəzadə
AFFA nümayəndəsi: Elbrus Abbasov
Hakim-inspektor: Əli Hüseynov
Qəbələ şəhər stadionu (CBC Sport)
İlk oyun - 1:1
"Qarabağ" – "İnter" - 1:0
Qol: Migel Madera, 23
68-ci dəqiqədə Vüqar Nadirov penaltini dəqiq vura bilmədi (qapıçı)
Hakimlər: Ramil Diniyev, Azər Əsgərov, İsgəndər Əliyev, Rövşən Rəcəbov
AFFA nümayəndəsi: Ramiz Abdullayev
Hakim-inspektor: Şahin Cəfərov
"Əlincə Arena" (CBC Sport)
İlk oyun - 4:0
Qeyd edək ki, final oyunu mayın 25-də keçiriləcək.
