UEFA Xorvatiya Futbol İttifaqı və Türkiyə Futbol Federasiyası ilə bağlı qərarını iyunun 20-də açıqlayacaq. Sportnet.az-ın məlumatına görə, bu, hər iki ölkənin futbol fanatlarının xoşagəlməz davranışları ilə bağlıdır.
Xorvat azarkeşlər milli komandalarının Çexiya yığması ilə 2:2 hesabı ilə nəticələnən matçını yarımçıq dayandırıblar. Buna səbəb istifadə olunan pirotexnikalar, meydana fişənglər atılması və azarkeşlərin tribunada dava-dalaş salmalarıdır. Xorvat fanatlar həmçinin nasist simvollardan istifadə ediblər.
Türkiyə yığmasının azarkeşləri isə İspaniyaya 0:3 hesabı ilə uduzduqları matçda pirotexnikadan istifadə edib, meydana fişənglər atıblar. Onlar həmçinin meydana daxil olmaqda günahlandırılır. UEFA məsələ ilə bağlı araşdırmalara başlayıb və yekun qərarı iyunun 20-də açıqlayacaq.
Xatırladaq ki, qitə futbol qurumu Rusiya Futbol İttifaqını ötən həftə 150 min avro cərimələyib, Rusiya yığmasını şərti cəzalandırıb. Rus azarkeşlər millilərinin İngiltərə yığması ilə 1:1 hesabı ilə nəticələnən oyunda insidentdə iştirak ediblər.
