Avropa Liqasının birinci təsnifat mərhələsi çərçivəsində sabah keçiriləcək "Baltsan” – "Neftçi” oyunundan əvvəl mətbuat konfransı baş tutub. Sportnet.az-ın məlumatına görə, bu gün keçirilən konfransda komandamızın baş məşqçisi Vəli Qasımovla yarımmüdafiəçisi Elşən Abdullayev jurnalistlərin suallarını cavablandırıblar.
Qasımov Maltada səfərdə onları çətin oyun gözlədiyini bildirib: "Rəqib haqda məlumat toplamışıq, zəif komanda deyil. Hücumçuları xoşumuza gəldi, Malta milli komandasının üzvüdür. Orta xəttdə də yaxşı futbolçuları var. Sadə futbol oynayırlar və nəticə qazanırlar. Bununla belə, istəyirik ki, burada yaxşı oyun göstərib ilk mərhələni biz keçək. Yeni transferlərimiz var, onların oyununu bəyənib komandaya cəlb etmişik. Düzdür, düşərgəyə yeni qoşulublar, amma hesab edirəm ki, bu qısa müddət ərzində komandaya uyğunlaşa biliblər”.
Abdullayev havanın isti olmasından gileylənməyib: "Bakıda da, demək olar, havanın temteraturu bura ilə eynidir. Havaya görə çətinlik yaşayacağımıza inanmıram. İnanıram ki, komanda şəklində yaxşı oynayıb sərfəli nəticə qazanacağıq”.
