"Neftçi" avrokuboklarda ilk dəfə Makedoniya təmsilçisinə rəqib olub. Sportnet.az-ın məlumatına görə, bu, Avropa Liqasının II təsnifat mərhələsində "Şkendiya" ilə sınaq olacaq.
Tetovo təmsilçisi son ölkə kubokunun qalibi kimi turnirə qatılıb. O, ölkə çempionluğu və Super Kuboku da 1 dəfə qazanıb.
Tetovo şəhərində yaşayan albanlar tərfəindən 1979-cu ildə yaradılan "Şkendiya" avrokuboklarda yalnız 5 il öncə debüt edərək cəmi 10 oyun keçirib. İlk dəfə mərhələ adlaması isə yalnız cari mövsümdə olub. "Neftçi"nin rəqibi Polşanın "Krakoviya" klubunu hər 2 oyunda məğlub edib - evdə 2:0, səfərdə 2:1.
"Neftçi"dən fərqli olaraq, digər klublarımız makedoniyalılarla avrokuboklarda görüşüb. Özü də bu duellər bizim üçün əksər vaxt uğurlu alınıb. "Qarabağ" Avropa Liqasında 2 dəfə rəqib olduğu "Metallurq"u hər iki halda keçib. "İnter"in isə avrokuboklarda siftəsi məhz bu ölkənin təmsilçisi ilə olub və debütdəcə mərhələ keçməyi bacarıb. Bu, "Rabotniçki" ilə Makedoniyada qollu heç-heçə sayəsində olub.
Yalnız "Kəpəz" Makedoniya səddini keçə bilməyib. Əslində, makedonlarla həmin ilk duelimizdə ümumi hesab bərabər olsa da, rəqib "Sloqa Yuqomaqnat" səfər qolu sayəsində mərhələ adlayıb. Klublarımız indiyədək Makedoniyanın paytaxt təmsilçiləri ilə üzləşsə də, "Şkendiya" qeyri-paytaxt klubudur.
Azərbaycan və Makedoniya klublarının avrokuboklarda görüşləri
1999/2000 mövsümü
Çempionlar Liqası, I təsnifat mərhələsi
"Sloqa Yuqomaqnat" (Skopye) - "Kəpəz" (Gəncə) - 1:0
"Kəpəz" - "Sloqa Yuqomaqnat" - 2:1
Qollar: Ramiz Məmmədov, Vidadi Rzayev, 90-pen
2008/2009 mövsümü
Çempionlar Liqası, I təsnifat mərhələsi
"İnter" (Bakı) - "Rabotniçki" (Skopye) - 0:0
"Rabotniçki" - "İnter" - 1:1
Qol: Bronislav Çervenka
2010/2011 mövsümü
Avropa Liqası, I təsnifat mərhələsi
"Qarabağ" (Ağdam) - "Metallurq" (Skopye) - 4:1
Qollar: Rəşad Sadiqov-pen, Əfran İsmayılov, Emin İmaməliyev, Georgi Adamiya
"Metallurq" - "Qarabağ" - 1:1
Qol: Emin İmaməliyev
2013/2014 mövsümü
Avropa Liqası, I təsnifat mərhələsi
"Metallurq" (Skopye) - "Qarabağ" (Ağdam) - 0:1
Qol: Reynaldo Silva
"Qarabağ" - "Metallurq" - 1:0
Qol: Leroy Corc.
