Braziliyalı futbolçu Riçard Almeyda 4 ildir şərəfini qoruduğu "Qarabağ" klubunun tarixinə düşüb. Sportnet.az-ın məlumatına görə, 27 yaşlı yarımmüdafiəçi Ağdam təmsilçisinin 1996-cı ildən təmsil olunduğu avrokuboklarda dubl edən ilk legioneri olub.
Arxada qalan 20 ildə heç bir əcnəbi futbolçuya qitəmiqyaslı turnirdə 1 oyunda 2 qol vurmaq nəsib olmamışdı. Almeyda hənin tarixi olayı Çempionlar Liqasının (ÇL) II təsnifat mərhələsində Lüksemburqun "Düdelanj" klubu ilə matçda gerçəkləşdirib. Riçard Tofiq Bəhramov adına Respublika stadionunda keçirilən matçın 10-cu (penaltidən) və 27-ci dəqiqələrində vurduğu qollarla 17 dəqiqəyə dubl edib. Matç elə onun fərqlənməsi nəticəsində 2:0 hesablı qələbəmizlə yekunlaşıb.
Bu, "Qarabağ"ın ÇL-də ilk, avrokuboklarda 4-cü dublu olub. Ağdamlıların əvvəlki dubllarından 1-i İntertoto kubokunda, 2-si Avropa Liqasında olub. İlkə hazırda komandanın məşqçisi olan Müşfiq Hüseynov imza atıb. Azərbaycanın eyni zamanda avrokuboklarda ilk dublunun müəliif olan hücumçu 1999-ci ildə İntertoto kubokunda ilk mərhələdə Hayfanın "Makkabi" klubu ilə səfır matçında fərqlənib - 2:1. Bu, sonda ilk dəfə avrokuboklarda mərhələ keçməyimizlə nəticələnib.
2010-cu ildə Avropa Liqasının II təsnifat mərhələsində Şimali İrlanidyanın "Portadaun" klubu ilə səfər matçında yarımmüdafiəçi Əfran İsmayılov dubl edib. Həmin ilk oyun da "Qarabağ"ın 2:1 hesablı qələbəsi ilə bitib.
Ən nəhayət, hücumçu Vüqar Nadirov 2011-ci ildə Avropa Liqasının I təsnifat mərhələsində Litvann "Banqa" klubuna səfərdə 4:0 hesabı ilə qalib gəldikləri oyunda dubl müəllifi olub. Nadirovun yenidən "Qarabağ"a qayıtdığını nəzərə alsaq, hər 3 yerli dubl müəllifi hazırda da komandanın şərəfini qoruyur.
Göründüyü kimi, əvvəlki dubllar bir qayda olaraq rəqib meydanında olub. Ancaq Almeyda həm ÇL-də, həm də evdə 2 qol vurması ilə seçilib. Hücumçu Reynaldo Silva nəinki "Qarabağ"ın, avrokuboklarda Azərbaycanı klublarının bombardiri olsa da, həmyerlisindən fərqli hələ də dubl edə bilməyib. O, hər oyunda uzağı 1 qol vurub və ümumilikdə 9 dəfə fərqlənib.
Xatırladaq ki, Almeyda Premyer Liqada bir neçə dəfə dubla imza atıb.
