AVRO-2016-nın qəhrəmanı portuqaliyalı hücumçu Eder Avropa Liqasının III təsnifat mərhələsində "Qəbələ" ilə cavab matçında iştirak edə biləcək. Sportnet.az-ın məlumatına görə, Fransa ilə final matçında vurduğu qələbə topu ilə Portuqaliya milli komandasının heyətində Avropa çempionu olan futbolçu Bakıdakı oyuna hazırlaşır.
Qitə birinciliyindən sonra istirahət verilən Eder artıq klubunun düşərgəsinə qayıtsa da, "Qəbələ" ilə 1:1 hesabı ilə nəticələnən ev matçını tribunadan izləyib. Əsas komandanın yeni mövsümə təlim-məşq toplanışında iştirak etməyən hücumçu aşağı liqa təmsilçisi "Dunkerk"lə yoxlama matçında iştirak edib. Daha çox ehtiyatda qalna futbolçularına şans verən "Lill" 2:2 hesablı heç-heçə edib.
Start heyətində meydana çıxan Eder 31-ci dəqiqədə hesabı açıb və fasilədə əvəzlənib. "Lill"in yeni transferi, "Genqam" klubundan alınan yarımmüdafiəçi Yunis Sankare 52-ci dəqiqədə hesabı 2:0 edib. Ancaq rəqibimiz bundan az sonra 5 dəqiqəyə 2 qol buraxaraq qələbəni əldən verib. "Qəbələ"yə qarşı oynamayan Sankare də əvəzlənib.
Xatırladaq ki, "Qəbələ" - "Lill" matçı avqustun 4-də keçiriləcək.
