"Çox yaxşı tədbirdir. Məndə ən xoş təəssüratlar yaratdı. "Qəbələ"də yeni olmağıma baxmayaraq, məni görməyə çox adam gəlib. Bu, eyni zamanda komanda yoldaşlarım Teo Uikslə Rəşad Sadiqova da aiddir".
Bu fikirləri Sportnet.az-a açıqlamasında "Qəbələ"nin fransalı hücumçusu Baqali Dabo deyib. Bu gün "qırmızı-qaralar"ın məşqçi heyəti və futbolçuları "Gənclik Mall”da yerləşən "Go Sport” mağazasında "Gabala Korner"in təqdimatında iştirak ediblər.
Dabo Uks və Sadiqovla birgə azarkeşlərlə maraqlı müsabiqələrdə – "Play Station” turniri və masaüstü futbol yarışında iştirak edib, xatirə çəkli çəkdirib: "Bu, onu göstərir ki, azarkeşlər həmişə "Qəbələ"nin oyunlarını izləyir. Bu gün onlarla birgə olduq, maraqlı müsabiqələrdə iştirak etdik. Onların bizimlə çoxlu şəkil çəkdirmələri də sevgilərini göstərir".
Dabo Avropa Liqasının pley-off mərhələsində Sloveniyanın "Maribor" klubu ilə qarşıdakı sınaqla bağlı fikirlərini bölüşüb. Onun fikrincə, bu cütdə şanslar bərabərdir: "Hər iki oyunda komandaların qələbə şanslarını eyni dəyərləndirirəm. Gərgin mübarizə gedəcək. Kim meydanda daha çox mübarizə aparsa, o da qalib gələrək qrupa düşəcək".
Yay fasiləsində "Qəbələ"yə keçən 28 yaşlı legioner Avropa Liqasında məhsuldar ötürmə sayının çoxluğu ilə UEFA-nın da diqqətini çəksə də, bu turnirdə qol hesabını aça bilməyib. O, komandamızda yeganə qolunu Premyer Liqanın ilk turunda "Kəpəz"ə vurub.
Maraqlıdır, azarkeşlər Dabodan "Maribor"la oyunlarda qol gözləsinlərmi? "Mənim üçün vacib olan qalib gəlməyimizdir. Qol vurmasam da olar. Məhsuldar ötürmə verməyə də bilərəm, əsas məsələ qələbə qazanmağımızdır. Əlbəttə, qol vursaydım, bu, çox yaxşı, ikiqat sevindirci olardı. Ancaq mənim üçün qol vurmağım yox, komandamın qalib gəlməsi önəmlidir".
P.S. Dabo ilə söhbətdən sonra oğlum Muradla birgə şəkil çəkdirməyimizi təklif etdim. Legioner da bunu məmnuniyyətlə qəbul edərək uşaqlar üçün tədbirdə çoxsaylı fotolarından birini kameranın yaddaşını köçürdü.
