"Qarabağ"ın Avropa Liqasının "pley-off" mərhələsində İsveçin "Göteborq" klubu ilə səfər qarşılaşması Azərbaycanda yayımlanmayacaq. Sportnet.az-ın məlumatına görə, buna səbəb klubun telekanaldan edilən müraciətə müsbət cavab verməməsidir.
"CBC Sport"un baş redaktoru Şəmsəddin Abbasov Sportnet.az-a açıqlamasında oyunun yayımlanmamasını belə izah edib: "Qarabağ"a on gün əvvəl oyunların yayımlanması ilə bağlı rəsmi müraciət etmişik. Lakin heç bir cavab yoxdur. Oyun sabah olsa da, hələ də bir cavab yoxdur. Üstəlik, cavab olsa belə, gecdir. Oyunların yayımlanması üçün klubla müqavilə imzalanır. Bu müqavilədə klubun da öz tələbləri olur. Məsələn, sponsor şirkətin məhsulunun reklamı və s. "Pley-off" mərhələsinin yayımı üçün biz "Qarabağ"a pul da təklif etdik. Biz də həmin oyunu xarici kanallara satmaq istəyirdik. Bir günə yayım satmaq olmaz. Üstəlik, bir məsələ də var. Müqavilə hər iki oyun üçün nəzərdə tutulur. Məsələn, biz səfər oyunu yayımlasaq, Bakıdakı oyunu başqa telekanal versə, o zaman biz səfərdə görüntü aldığımız kanala siqnal ötürə bilməyəcəyik. Belə olan halda, qarşı tərəfə cərimə ödəməyə məcburuq. Oyunun bizim kanalda yayımlanmamasına səbəb "Qarabağ"ın indiyədək müraciətimizə cavab verməməsidir. Ancaq "Qəbələ" ilə müqavilə imzalamışıq və hər iki oyunu biz yayımlayacağıq".
Avropa Liqasının qrup mərhələsinin yayım hüququ isə AZTV və "İdman Azərbaycan" kanalındadır. Lakin aidiyyatı kanallardan da Sportnet.az-a "Qarabağ"ın səfər oyunun yayımlanmayacağı bildirilib.
Qeyd edək ki, avrokuboklara Çempionlar Liqasının II təsnifat mərhələsindən start verən "Qarabağ"ın oyunları "CBC Sport" kanalında yayımlanıb.
