"Komandanın hazırkı durumunun yaxşı olduğunu söyləmək mümkündür. "Qəbələ" Hollandiya toplanışı boyunca keçirdiyi sınaq matçlarında güclü klublarla başa-baş mübarizə apardı”. Sportnet.az-ın klubun rəsmi saytına istinadən məlumatına görə, bu sözləri "Qəbələ”nin yeni transferi Ruslan Əmircanov deyib.
Futbolçu açıqlamasında Hollandiyada keçirilən toplanışı dəyərləndirib: "90 dəqiqə boyunca rəqiblərlə məzmunlu oyun göstərdik. Bu da komandanın həm fiziki, həm də psixoloji cəhətdən irəliyə doğru böyük addım atdığını deməyə əsas verir. Heyətdəki bütün futbolçuların və məşqçi lər korpusunun hazırlıq prosesinə ciddi yanaşması, məşqlərdə gərgin çalışması öz nəticəsini verir. Baş məşqçi meydançada da, kənarda da intizama hədsiz dərəcədə önəm verir. Biz də bunun xeyrini görürük. Keçirdiyimiz oyunlarda komandanın güclü və zəif tərəflərini müşahidə etdik. "İnter"lə oyuna qədər çatışmayan tərəflərimiz üzərində işləyib qarşılaşmaya tam hazır olacağıq".
