Əfsanəvi futbolçu Luis Saha bu gün "Qarabağ" klubunun bazasını ziyarət edib.
Sportnet.az-ın məlumatına görə, "Mançester Yunayted"in keçmiş fransalı hücumçusu Ağdam təmsilçisinin direktoru Əmrah Çəlikəl və baş məşqçi Qurban Qurbanovla kiçik toplantı keçirib və Azərbaycan futbolu haqda fikir mübadiləsi aparıb. Görüşün sonunda futbolçuya "Qarabağ"ın 9 nömrəli forması hədiyyə olunub.
Saha daha sonra komanda üzvləri ilə də bir araya gəlib. Futbolçulara və baş məşqçiyə uğurlar arzulayıb, "Qarabağ"ın Avropada layiq olduğu yerə gələcəyinə inandığını bildirib.
Sonda isə o, klubun məşqçi və texniki heyəti ilə bərabər futbol oynayıb.
Xatırladaq ki, Luis Saha Fransa millisində 20 oyuna çıxıb. O, "Mançester Yunayted"lə yanaşı, "Tottenhem", "Latsio" kimi klubların şərəfini qoruyub.
