Azərbaycan milli komandasının futbolçuları Kamran Ağayevlə Emin Mahmudovun çıxış etdiyi "Boavişta" klubu Portuqaliya çempionatında növbəti oyununa çıxıb. Sportnet.az-ın məlumatına görə, Porto təmsilçisi XIII tura yekun vuran səfər matçında "Pakoş de Ferreyra"nın qonağı olub.
Bu oyun öncəsi zədələndiyi məlum olan Ağayev tam sağalmadığı halda start heyətində yer alıb və yenə 90 dəqiqə qapıda olub. Mahmudov isə bu dəfə də əsas heyətdən kənarda qalaraq ehtiyatda yer alıb və 57-ci dəqiqədə meydana daxil olub. Bu, yarımmüdafiəçimizin "Boavişta"da 2-ci rəsmi matçı olub və hər ikisi çempionatın son iki turuna təsadüf edib.
Matça gəlincə, meydan sahibləri ilk hissədə 9 dəqiqəyə Ağayevin qapısına 2 dəfə yol tapıb. "Boavişta" 55-ci dəqiqədə həm penaltidən fəriq azaldıb, həm də rəqibin futbolçusu qırmızı vərəqə aldığına görə say üstünlüyü qazanıb. Ancaq qonaqlar bundan istifadə edərək məğlubiyyətdən xilas ola bilməyiblər.
Qeyd edək ki, cari çempionatda 5-ci dəfəı uduzan "Boavişa" 12 oyundan 13 xalla turnir cədvəlində 12-ci pillədə qərarlaşıb.
00:00. "Pakoş de Ferreyra" - "Boavişta" - 2:1
Qollar: Marko Joao Kosta Bayxinyo, 18, Fyel Sampayo Velthon, 27 - Renato Santos, 55-pen
Qırmızı vərəqə: Migel Vieyra, 55 ("Pakoş de Ferreyra", ikinci sarı)
