Azərbaycan kubokunun 1/4 final mərhələsi "Qarabağ"ın məhsuldar çıxışı ilə əlamətdar olub. Sportnet.az-ın məlumatına görə, Ağdam təmsilçisi "Sumqayıt"la oyunlarda 11 qol vurub.
Evdə 6:0, səfərdə isə 5:2 hesabı ilə qələbə qazanan Qurban Qurbanovun yetirmələri son 12 mövsümdə ilk dəfə eyni rəqibə 11 top vurub.
Əyalət klubunun son belə uğuru 2004/05 mövsümündə qeydə alınıb. 1/16 final mərhələsinin "Ədliyyə-2" (sonradan "Böyük Vadi” adlanıb) ilə qarşılaşmalarında da "Qarabağ" rəqibini 11 dəfə məyus edib. "Qarabağ" səfərdə 4:1, evdə 7:2 hesablı qələbə qazanıb.
Əyalət təmsilçisinin tarixində mütləq rekord isə 1997/98 mövsümünə təsadüf edib. 19 il əvvəl 1/16 finalın "Naftalan"la görüşlərində "Qarabağ" 14 qol vurub – 12:0, 2:1.
