"Neftçi" Azərbaycan milli komandasının üzvü olan Namiq Ələsgərovun keçidini rəsmiləşdirib. Bu haqda Sportnet.az-a komandanın baş məşqçisi Elxan Abdullayev məlumat verib. O, 21 yaşlı hücumçu ilə 1,5 illik müqavilə imzaladıqlarını bildirib: "Namiq artıq rəsmən "Neftçi"nin futbolçusudur. Onunla bu gün ilyarımlıq müqavilə imzaladıq. Ələsgərovu məşqçisi olduğum milli komandadan yaxşı tanıyıram. Gənc, perspektivli, istedadlı futbolçudur. O, hücumameyyli futbolçudur ki, "Neftçi"yə ön xəttə oyunçu lazımdır".
Abdullayev digər yeni transfer - Gürcüstan milli komandasının üzvü Georgi Navalovskini da yaxşı tanıyır: "Mən hələ "İnter"də məşqçi işləyəndə Navalovski orada çıxış edirdi. Həmin vaxtdan onu yaxşı tanıyıram, potensialına bələdəm. Navalovski milli koamndasına mütəmədi çağırılır. Son olaraq isə Yunanıstanən "Veriya" klubunda çıxış edib. O, sol cinah müdafiəçisidir ki, biz də bu mövqeyə futbolçu lazım idi. Seçimi tanıdığım legionerin üzərinə etdik. Georgi ilə 1 illik müqavilə imzaladıq".
Qeyd edək ki, millisində 19 oyun keçirən 30 yaşlı Navalovski 2010-cu ildə "İnter"də oynadığı yarım ildə Azərbaycan çempionu olub. O, "Neftçi"də 29, Ələsgərov isə 9 nömrəli formada çıxış edəcək.
Mehman SÜLEYMANOV
