"Bu mövsüm bizim üçün uğurlu oldu, indi isə qarşıdakı oyunlar haqda düşünürük".
Sportnet.az-ın məlumatına görə, bunu "Qarabağ"ın futbolçusu Ansi Aqolli Türkiyənin Antalya bölgəsindəki qış təlim-məşq toplanışını dəyərləndirərkən deyib.
Albaniyalı legioner hazırlıq prosesindən lazımınca faydalanaraq, mövsümün sonuna qədər ən yaxşısını etməyə çalışacaqlarını bildirib: "Ağır ili geridə qoyduq, həm "Qarabağ”da, həm də milli komandada çox oyunlar keçirdik. Daha sonra istirahət tam yerinə düşdü. İndi isə yaxşı hazırlaşıb mövsümü uğurlu tamamlamalıyıq. Hazırda da komandada əhval-ruhiyyə əladır. İstirahətdən qayıdandan sonra hər kəs özünü yaxşı hiss edir".
Aqolli geridə qalan ili də dəyərləndirib: "Ötən il mənim həyatımda xüsusi yer tutur. "Qarabağ”la ölkə kuboku və çempionatda qızıl medalları qazandıq. Milli komanda ilə Avropa çempionatının final mərhələsində mübarizə apardıq. Ümid edirəm ki, bu il daha çox mükafat qazanacağıq".
