Qazaxıstanın "Okjetpes" klubunun baş məşqçisi Vladimir Muxanov Azərbaycanın 21 yaşadək futbolçulardan ibarət yığma komandasını (U-21) dəyərləndirib. Sportnet.az-ın məlumatına görə, təcrübəli rusiyalı mütəxəssis Antalyadakı təlim-məşq toplanışında yoxlama oyununda 2:2 hesablı heç-heçə etdikləri yığmamızı tərifləyib.
Muxanov mübarizə şəraitində keçən oyunu izlədiklərini bildirib: "Azərbaycanlı futbolçular gənc, sürətli, texnikalıdırlar, gələcəyə ümid verirlər. Bugünkü rəqibimizi bəyəndim. Təlim-məşq toplanışında vəzifəmiz yükləmələri azaltmadan yoxlama oyunları keçirmək və böyük qrup potensial futbolçulara baxmaqdır. Eyni zamanda məqsədimiz artıq heyətdə olanlarla oyun təşkili ilə məşğul olmaqdır".
Qeyd edək ki, Muxanov matçda U-21 yığmamızın sabiq futbolçusu Samir Məsimova əsas heyətdə şans verib.
