Azərbaycan Kubokunun final qarşılaşmasında penalti seriyasında "Neftçi”yə məğlub olan "Qəbələ”nin baş məşqçisi Yuri Syomin komandasından narazı qalmadığını bildirib. Sportnet.az-a verdiyi açıqlamada rusiyalı mütəxəssis əvvəlcə mövsüm barədə danışıb: "Hesab edirəm ki, yaxşı mövsüm keçirdik. İrəliyə doğru böyük addım atdıq. Komanda "sıfır”dan başlayıb finaladək irəlilədi".
Syomin xeyli sayda insanın görüşdən zövq aldığını da əlavə edib. O, penalti seriyasını lotereya adlandırıb: "Gördüyünüz kimi, hətta Marat İzmaylov səviyyəsində futbolçular penaltidən qol vurmaya bilir. O ki qaldı 120 dəqiqəyə, hesab edirəm ki, çox yaxşı futbol alındı və xeyli insan bu görüşdən böyük zövq aldı".
Rusiyalı mütəxəssis gələcək karyerası barədə isə danışmaq istəməyib: "Bir az dincəlməliyəm. İndi bu suala cavab verməyə hazır deyiləm".
