"Sumqayıt" klubu 2 futbolçu ilə müqavilə bağlayıb. Sportnet.az-ın klubun rəsmi saytına istinadən məlumatına görə, bunlar dayaq yarımmüdafiəçisi Fərhad Qıstarovla cinah yarımmüdafiəçisi Sergey Çernışevdir.
Hər iki oyunçu ilə 1,5 illik anlaşma əldə olunub.
23 yaşlı əslən Balakəndən olan Qıstarov əvvəllər Rusiyanın "Dinamo" (Stavropol), SKA (Rostov) kimi klublarının şərəfini qoruyub. 27 yaşlı bakılı Çernışev isə karyerası ərzində, "Rəvan", Rusiyanın "Taqanroq" (13 oyun, 4 qol), "Dinamo QTS" (28 oyun, 3 qol), "Lokomotiv" (8 oyun, 1 qol) və "Drujba" (15 oyun, 2 qol) klublarının şərəfini qoruyub.
Qeyd edək ki, Fərhad Qıstarov "Sumqayıt"da 20, Sergey Çernışev isə 7 nömrəli formanı geyinəcək. Mövsümün ilk yarısında 7 nömrəli formanı qış fasiləsində komandadan ayrılan Vaqif Cavadov geyinib. 20 nömrəli formada isə heç kim çıxış etməyib.
