"Məğlub durumda ola-ola son saniyələrdə qol vurmaq bizi sevindirir. İnanıram ki, qazanılan bir xal avrokuboklara yollanmağımızda bizə çox kömək olacaq. Ancaq qarşıda hələ iki oyun var". Sportnet.az-ın məlumatına görə, bunu "Zirə”nin kapitanı Elvin Məmmədov "Sumqayıt”la 1:1 hesablı heç-heçə etdikləri Azərbaycan Premyer Liqasının XXVI tur matçından sonra deyib.
Yarımmüdafiəçi "Sumqayıt”la müqayisədə daha üstün futbol oynadıqlarını bildirib: "Kənardan hər şey daha yaxşı görünür. Qol vurmaq üçün çox şansımız var idi. İlk yarıda daha çox qol şansımız oldu. Amma dəyərləndirə bilmədik, əksinə qolu "Sumqayıt” vurdu. Buna baxmayaraq matçdan qopmadıq və son saniyələrdə olsa belə, qolumuzu vurduq”.
"Zirə"nin kapitanın komandasının avrokubok şanslarını da dəyərləndirib: "Futbolda hər şey mümkündür. "Neftçi” və AZAL-la
oyunlarımız var. Maksimum xal yığaraq yolumuza davam etmək istəyirik. Mövsümün
gedişində yeni baş məşqçimiz gəldi. Ondan sonra xallarımızı yığmağa başladıq. Hər
halda avrokuboklar oyunu tamam başqadır. Təki Avropa Liqasına vəsiqə qazanaq. Yəqin
ki, yeni gələnlər də olacaq, gedənlər də. İndidən bu barədə danışmaq tezdir".
