İngiltərə Premyer Liqasının ilk turunda "Börnli" ilə matçda qırmızı vərəqə alaraq yaşıl meydanlardan kənarda qalan "Çelsi"nin futbolçusu Qari Keyhil Çempionlar Liqasının startını səbirsizliklə gözləyir.
Sportnet.az-ın məlumatına görə, 31 yaşlı futbolçu qrup mərhələsinin ilk turunda "Qarabağ"la keçirəcəkləri oyun barədə danışıb. O, komandasının bu rəqabətdə xüsusi yerinin olduğunu vurğulayıb: "Biz layiq olduğumuz yerdəyik. Bu rəqabətdə olmağımız vacibdir və çalışacağıq ki, maksimum xallar qazanaraq daha da irəli gedək".
Futbolçu "Qarabağ"a ciddi rəqib olaraq yanaşdıqlarını bildirib: "Onlar qrup mərhələsində oynamaq hüququ qazanıblar. Bu baxımdan biz "Qarabağ"a ciddi rəqib kimi yanaşırıq. "Qarabağ" haqda o qədər də məlumatlı deyiləm. Amma belə komanda ilə açılış oyununda qarşılaşmağımız püşk sarıdan yaxşıdır".
Qeyd edək ki, "Çelsi" - "Qarabağ" matçı sentyabrın 12-də Bakı vaxtı ilə 22:45-də başlayacaq.
