Çempionlar Liqasının (ÇL) qrup mərhələsində "Qarabağ”ın rəqibi olan İspaniya təmsilçisi "Atletiko”nun futbolçusu Fernando Torres qış fasiləsində komandanı tərk etməyi düşünür.
Sportnet.az "Cadena Ser” radiosuna istinadən xəbər verir ki, 33 yaşlı hücumçu az oynamasından narazıdır. Qış fasiləsindən sonra İngiltərə "Çelsi”sindən transfer olunan Dieqo Kostanın da meydana çıxa biləcəyini göz önünə alan təcrübəli forvard alternativ variantları gözdən keçirir.
Madrid klubu ilə 2018-ci ilin iyununadək müqaviləsi olan hücumçunun xidmətində ABŞ və Çin klubları maraqlıdır.
F.Torres 2017/2018 mövsümündə La Liqa, İspaniya Kuboku və ÇL daxil olmaqla ümumilkdə 10 matçda iştirak etsə də, qol vura bilməyib.
Qeyd edək ki, "Atletiko”nun yetirməsi olan F.Torres karyerası ərzində İngiltərənin "Liverpul”, "Çelsi” və İtaliyanın "Milan” klublarının formasını geyinib. O, İspaniya millisinin heyətində 110 keçirib və 38 qol vurub.
Xatırladaq ki, "Qarabağ" qrup mərhələsində "Atletiko"ya qarşı keçirdiyi hər iki oyunda heç-heçə edib. Bakıda 0:0, Madriddə isə 1:1 hesabı qeydə alınıb.
