Bakı Olimpiya Stadionunda "Qarabağ" və İngiltərənin "Çelsi" komandaları arasında keçiriləcək Çempionlar Liqasının qrup mərhələsinin V tur oyununu stadiondan izləyəcək azarkeşlərin təhlükəsizliyi üçün bütün tədbirlər görülüb. Sportnet.az xəbər verir ki, bunu "Trend”ə açıqlamasında Bakı Şəhər Baş Polis İdarəsinin rəis müavini, polis general-mayoru Səhlab Bağırov deyib.
Rəis müavininin sözlərinə görə, daxili işlər naziri, general-polkovnik Ramil Usubov tədbirlər planı təsdiqləyib: "Cənab nazirin təsdiqlədiyi tədbirlər planına uyğun olaraq, əraziyə polis qüvvəsi cəlb ediləcək və azarkeşlərin təhlükəsizliyi təmin ediləcək".
Qeyd edək ki, noyabrın 22-də Bakı Olimpiya Stadionunda keçiriləcək "Qarabağ" - "Çelsi" oyunu saat 21:00-da start götürəcək. Qarşılaşma üçün nəzərdə tutulmuş 67 500 bilet artıq satılıb.
