Topaz Premyer Liqasında XIII tura bu gün keçirilmiş iki oyunla yekun vurulub. Sportnet.az-ın məlumatına görə, günün ilk görüşündə "Sumqayıt" və "Səbail" komandaları üz-üzə gəlib.
"Kapital Bank Arena"da təşkil olunmuş qarşılaşma qolsuz yekunlaşıb - 0:0. FİFA referisi Rəhim Həsənovun idarə etdiyi matçda meydan sahibləri ərazi üstünlüyünə malik olublar. Lakin bir neçə epizodda əlverişli imkanlardan yararlanmaq mümkün olmayıb. Qonaqların isə nadir əks-hücumları nəticə verməyib.
Beləliklə, Səbail" ilk dövrədə olduğu kimi, meydanı qolsuz tərk edib. Lakin "Sumqayıt" səfərdə 2:0 hesablı qələbə qazandığı həmin oyunla müqayisədə, doğma meydanda qol vura bilməyib. Bununla belə, Samir Abasovun baş məşqçi olduğu komanda xallarını 17-yə çatdıraraq, yenidən 4-cü pilləyə yüksəlib. 13 xalı olan "Səbail" isə yenə 6-cı pillədə qalıb.
Bu qarşılaşmanın ardından "Zirə" və "Qarabağ" komandaları üz-üzə gəlib. Zirə İdman Kompleksinin stadionundakı görüş ilk oyun günündəki kimi, bolqollu olub. Keçmiş FİFA referisi Fariz Yusifovun idarə etdiyi matçda iki kollektiv artıq 10-cu dəfə üz-üzə gəlib. Əvvəlki 9 oyunun 6-da Qurban Qurbanovun baş məşqçi olduğu komanda qələbə qazanmış, daha 3 matçda, o cümlədən, son 2 görüşdə heç-heçə qeydə alınmışdı. Ardıcıl 8 oyunda - daha dəqiqi 2015-ci il dekabrın 13-dən bəri "Zirə" Ağdam klubuna qol vura bilməmişdi. Amma bu dəfə Ayxan Abbasovun baş məşqçi olduğu kollektiv ilk yarını 0:2 hesabı ilə geridə başa vursa da, fasilədən sonra fərqlənməyə müvəffəq olub. Lakin qonaqların 3 qoluna meydan sahibləri 2 topla cavab verə biliblər.
Beləliklə, "Qarabağ" 12 görüşdən 31 xal toplayaraq, yenidən vahid liderə çevrilib. Ağdam komandasının ehtiyatda "Səbail"lə oyunu da var. "Zirə" isə 13 matçdan 27 xalla 3-cü pillədə qalıb.
Topaz Premyer Liqası, XIII tur
26 noyabr
16:00. "Sumqayıt” – "Səbail” - 0:0
Hakimlər: Rəhim Həsənov, İsgəndər Əliyev, Elşad Abdullayev, Rəvan Həmzəzadə
AFFA nümayəndəsi: Rauf Hüseynli
Hakim-inspektor: Vüsal Əliyev
"Kapital Bank Arena”
18:00. "Zirə” – "Qarabağ” - 2:3
Qol: Vüsal İskəndərli, 51. Riçard Qadze, 67 - Riçard Almeyda, 21. Dino Ndlovu, 26. Mahir Mədətov, 62
Hakimlər: Fariz Yusifov, Azər Əsgərov, Nahid Əliyev, Orxan Məmmədov
AFFA nümayəndəsi: Şaiq Həmidov
Hakim-inspektor: Məlik Həsənov
Zirə İdman Kompleksinin stadionu
Qeyd edək ki, turun ilk oyun günündə "Qəbələ" səfərdə "Kəpəz"i 6:1, "Neftçi" isə evdə "Keşlə"ni 3:1 hesabı ilə yenib.
