"Çətin olacağını bilirdik. Lakin yekunda hamının ümid bəslədiyi nəticəni əldə etdik”.
Sportnet.az xəbər verir ki, bunu İtaliyanın "Roma” komandasının futbolçusu Daniele De Rossi Çempionlar Liqasının qrup mərhələsinin VI turunda "Qarabağ” üzərində 1:0 hesablı qələbədən sonra deyib.
Paytaxt komandasının 34 yaşlı kapitanı C qrupunun qalibi olmalarını fantastik nəticə sayır. Onun sözlərinə görə, bu nailiyyət "Roma”nın Avropadakı nüfuzunu bərpa edəcək: "Bu, "Roma”nın nüfuzu, komandanın özünəinamı və mövsümün qalan hissəsi üçün məhtəşəm nəticədir. Biz xoşbəxtik. Son illə avrokuboklarda yaxşı çıxış etməmişdik. Bu nailiyyət klubun öz nüfuzunu bərpa etmək üçün bir vasitədir. Bu cür çətin qrupu 1-ci yerdə tamamlamaq fantastikadır”.
Qeyd edək ki, İngiltərə çempionu "Çelsi” ilə eyni – 11 xala malik "Roma” şəxsi oyunlara görə 1/8 finala C qrupunun qalibi qismində yüksəlib. 7 xalla 3-cü yeri tutan İspaniya "Atletiko”su isə mübarizəni Avropa Liqasında davam etdirəcək.
