Zədə səbəbindən futbol üzrə Azərbaycan millisinin Belarus və Makedoniya yığmalarına qarşı keçirəcəyi oyunlar üçün heyətdən kənar qalan Ufuk Budakın meydana qayıdacağı tarix bəlli olub.
Sportnet.az-ın məlumatına görə, bu barədə 28 yaşlı sol cinah müdafiəçisinin formasını geyindiyi Türkiyənin I Liqasında çıxış edən "Samsunspor” klubunun həkimi Mehmet Özden açıqlama verib.
O, bildirib ki, Budak aprelin 8-də XXX tur çərçivəsində "İstanbulspor”la ev oyununda sıraya dönəcək.
Qeyd edək ki, Ufuk Budak "Samsunspor”un XXVII turda səfərdə "Qaziantepspor”a 1:2 hesabı ilə uduzduğu görüşdə qasıq nahiyyəsindən zədə alıb və müayinə üçün Almaniyaya göndərilib. O, zədəli olduğu üçün Azərbaycan millisinin martın 23-də Belarus, 27-də isə Makedoniyaya qarşı yoldaşlıq görüşlərinə çağırılmamasını xahiş edib.
