Azərbaycan milli komandasının futbolçusu Ruslan Abışov yoldaşlıq oyununda Belarusa 0:1 hesabı ilə məğlub olduqları oyundan sonra jurnalistlərin suallarını cavablandırıb.
Sportnet.az həmin müsahibəni təqdim edir:
- Yoldaşlıq görüşü də olsa, tarixdə nəticə qalır. Milli komandada nə çatmır?
- Doğma azarkeşlər önündə oynayırdıq. Təzə baş məşqçi ilə evdə ilk oyun idi. Qələbə qazanmaq istəyirdik. Düşünürəm ki, oyun yaxşı gedirdi. Rəqib də gördü ki, biz yaxşı nəticə qazanmaq barədə fikirləşirik. Oyuna biz nəzarət edirdik. Top ən çox komandada olurdu. Bir neçə qol epizodlarımız oldu. Amma rəqib bizi əks hücumda yaxaladı. Bəxtimiz gətirmədi və qapımızda qol gördük. Həm də milli komandada yeni futbolçular var. Komanda yenidən qurulur. Qurban müəllimin istədiyi oyunu meydanda tam şəkildə göstərə bilmirik. Oyundan-oyuna hər şey daha yaxşı olacaq. Çünki futbolçular başa düşür ki, baş məşqçi onlardan nə istəyir. Həmin istəkləri maksimum dərəcədə yerinə yetirsək, qarşıdakı oyunlarda daha yaxşı nəticələr əldə edə bilərik. Bu matçlar Millətlər Liqasına hazırlıqdır. Həmin turnirdə rəqiblər bizə qarşı bu tempdə oynayacaqlar. Əks hücumlara üstünlük verəcəklər. Yoldaşlıq oyunlarında da nəticə qazanmaq lazımdır. Rəsmi oyunlara təcrübə çıxmalıyıq. Əsas oyunlarda səhv etməməliyik.
- Səncə, yeni futbolçular özlərini necə göstərdilər?
- Milli komandaya çağırılan futbolçuların hər biri ölkə çempionatında yaxşı çıxış edirlər. Onların haqqında mənfi fikir söyləyə bilmərəm. Hər birinə uğurlar arzulayıram. İnanıram ki, gələcək oyunlarda komandaya daha çox köməklik göstərəcəklər.
- Qol epizodu necə oldu?
- Həmin epizodda bəxtimiz gətirmədi. İlk hissənin sonlarında qapımızda qol gördük. Oyunun gedişatını dəyişmək istəyirdik. İkinci hissənin əvvəlində qol epizodu oldu. O imkandan yararlana bilsəydik, matç daha fərqli olacaqdı. Əsas odur ki, belə oyunlardan nəticə çıxardaq. Bu oyun da bizim üçün təcrübədir. Qarşıdakı görüşlərdə diqqətli olmalıyıq ki, belə səhvlər etməyək.
- Azərbaycan milli komandası iki yoxlama oyunu keçirib. Bu görüşlərdəki nəticələri nəzərə alaraq, Millətlər Liqasındakı şansları necə dəyərləndirirsən?
- Nəticə hər zaman önəmlidir. Rəsmi oyunlarla yoxlama matçlarının arasında tamam başqa fərq var. Oyunçular rəsmi oyunlarda daha da məsuliyyətli olurlar. Sentyabra kimi vaxtımız var. Hər bir futbolçu həm klubunda həm də millidə maksimum dərəcədə çalışmalıdır ki, Millətlər Liqasında yaxşı nəticə əldə edək.
