İtaliyada 13 yaşadək futbolçular arasında Qallini Dünya Kubokunda yarımfinal oyunları keçirilib.
Sportnet.az-ın məlumatına görə, ardıcıl 5 qələbə ilə bu mərhələyə yüksələn "Qəbələ” İngiltərənin "Uimbldon” klubunun müvafiq yaş qrupu üzrə komandası ilə görüşüb. Qarşılaşmanın əsas vaxtı 1:1 hesabı ilə başa çatıb. "Qırmızı-qaralar”ın qoluna Elmir Hüseynli imza atıb. Finalçının adına penaltilər seriyası aydınlıq gətirib. Zərbələri daha dəqiq yerinə yetirən ingiltərəlilər 5:4 hesablı qələbə qazanıb.
"Qəbələ” bu gün keçiriləcək 3-cü yer uğrunda oyunda Sloveniyanın "Bravo” komandası ilə üz-üzə gələcək. Yarışın qalibi adı uğrunda matçda isə "Uimbldon” və İtaliya "Udineze”si mübarizə aparacaq.
